Dyma bump o’r prif bwyntiau i ystyried wrth ragolygu gweddill y Tour de France wedi tri chymal brwdfrydig yn yr Alpau.
Geraint neu Froome?
Dyma gwestiwn mwya’r Tour de France eleni.
Mae Geraint Thomas, y Cymro, yn y crys melyn wedi dwy fuddugoliaeth o’r bron ar cymal 11 ac 12 – y ddau’n gorffen ar gopa dringfa.
Ganddo dros funud a hanner o wacter rhyngddo a Chris Froome, sydd yn yr ail safle ar y DC, a bron i ddwy funud o fantais dros Tom Dumoulin yn y trydydd safle.
Mae’n amlwg i mi beth bynnag mai Geraint yw’r cryfaf o’r ddau arweinydd yn nhim Sky wedi’w berfformiadau’n yr Alpau a choesau Froome yn edrych yn sigledig wedi’w gampau’n y Giro d’Italia.
Ond mynnai Thomas taw Froome yw rhif un Sky. Credaf y dylai’r tim roi popeth tu ol i Geraint gan gadw Froome ym mhump ucha’r DC er mwyn dyblu’w siawns o ennill y ras.
Serch hyn, fy marn (a wyrai tu ag at ochr G) yn unig yw’r uchod ac mae’n bur debyg i’w penderfyniad fod yn dra wahanol..
Y Pyreneau
Mae’r Pyreneau yn mynd i herio pob reidiwr i’w heithaf heb os nac oni bai ac un cymal yn sefyll allan.
Cymal 17. Mae’n 65km o hyd – un o’r byrraf erioed – a threfnir system gridio fel bod y reidwyr sydd yn yr 20 safle uchaf (DC) yn cychwyn cyn y gweddill.
Rhaid ffactorio hyn i fewn; bydd yn sicr yn ffafrio timau cryf fel Sky.
Ar y funud, mae ganddynt dri reidiwr yn y 20 uchaf (Froome, Geraint, Bernal); yn hafal gyda Movistar (Landa, Quintana, Valverde).
Y fantais i Sky yma yw bod Bernal yn gadfridog penigamp (profwyd hynny ar Alpe d’Huez) tra thri arweinydd sydd i dim Movistar.
Mae cefnogaeth hefyd i Romain Bardet yn Pierre Latour; a Jakob Fuglsang yn Tanel Kangert ond bydd nifer o’r ffefrynnau’n gorfod gweithio’u hunain.
Mae Tom Dumoulin yn un, gydag eraill megis Rafal Majka, Dan Martin, Ilnur Zakarin a Bob Jungels heb eu cadfridogion – a fyddent yn cyd-weithio fel uned?
Yn y cymalau cyn hynny, rhaid I Adam Yates esgyn o 21ain i 20fed i ail-sefydlu’w hun fel un o’r ffefrynnau.
Cymal 1
Dioddefodd Chris Froome ddamwain ar y cymal cyntaf sy’n parhau i fygwth ei gyfleon o ennill y Tour de France am y pumed tro.
Llwyddodd Geraint Thomas i osgoi hyn sydd wedi bod o fudd wrth iddo gynnal ei fantais ar frig dosbarthiad y ffefrynnau.
Pwy arall?
Cred nifer yw bod LottoNL Jumbo yn edrych yn gryf gyda dau o’I reidwyr yn y deg uchaf; Primoz Roglic a Steven Kruijswijk.
Yn y drydedd wythnos bydd rhai’n debyg o daro’u forte – Landa, Quintana a Froome a Dumoulin sy’n gyson yn dda yn ystod y ras hon.
Heb anghofio Bardet sy’n parhau I edrych yn gryf ond profodd Geraint yn y Dauphine ei fod yn gryfach na’r Ffrancwr yn y mynyddoedd.
Effaith y Giro d’Italia
A fydd effaith y Giro yn cicio mewn yng nghoesau Froome a Dumoulin?
Hefyd – ennillodd Simon Yates nifer o gymalau a chadw’r crys pinc am ddyddiau ond craciodd yn yr wythnos olaf. All Geraint ddioddef o hyn hefyd?
Bydd popeth yn cael ei ddatgelu’n yr wythnos sydd yn weddill – cofiwch am raglen fyw a rhaglen uchafbwyntiau S4C, podlediad Y Dihangiad a chofnodion dyddiol y blog.
Коментарі