Taith Prydain | Rhagolwg

Mae Taith Prydain (OVO Energy Tour of Britain) yn dychwelyd ddydd Sul yma (yr ail o Fedi) gan gychwyn ar drac Pembre yng Sir Gar.


Bydd y cymal cyntaf yn Ne Cymru’n gyfle perffaith i groesawu gartref ennillydd y Tour de France, Geraint Thomas, sy’n rhan o dîm cryf Sky.


Y Cwrs


Unwaith eto eleni, prin ydy'r cwrs yn 'daith' o Brydain, ond mae'n braf gweld Cymru'n dychwelyd i'r ras eleni.


Cymal 1 - Pembre i Gasnewydd


Wedi dwy ddringfa yn y Bannau Brycheiniog - Bryn Bethlehem (categori 3) sy'n 1.8km ar 3% er gwaethaf serthedd uwch mewn mannau; a dringfa Defynnog (categori 3) sy'n gilometr ar 9% - bydd y reidwyr yn herio proffil bryniog cyn diweddglo gwastad lle disgwylir gwib glwstwr yng Nghasnewydd.


Ond llai na 10km o'r diwedd bydd dringfa Belmont (categori 2), sy'n 800m ar 9%, all dorri'r ras i ddarnau ac o bosib cyfle am ddihangiad llwyddiannus.

Cymal 2 - Cranbrook i Barnstaple


Mae cymal 2 yn cynnig proffil sy'n go debyg i cymal 1 gyda gwib glwstwr yn ddisgwyliedig.


Serch hynny, mae'r ddringfa olaf i Challacombe Hill (categori 1) yn 1.3km ar 13% i'w daclo 20km o'r llinell derfyn.


Cyn hynny, mae dwy ddringfa gategori 2 - Chineway Hill (2.8km ar 5.5%) a Bratton Fleming (4.9km ar 5%) - lle bydd cystadleuaeth glos am y pwyntiau sydd ar gael.



Cymal 3 - Bryste i Fryste


Mae copa'r ddringfa anoddaf o'r cymal hwn 7km o'r diwedd gan roi her cyn y diweddglo wibio unwaith eto.


1km ar 8.8% yw'r ddringfa hon, sef Providence Lane. Y ddwy ddringfa arall ar y cymal hwn yw Shipham (cat 4; 1.6km; 2.3%) a'r enwog Cheddar Gorge (cat 2; 5km; 4.5%).

Cymal 4 - Nuneaton i Royal Leamington Spa


Disgwylir cymal gwibio yma ar cymal sydd 183.5km o hyd.


Mae tair dringfa gategori 3 i ddelio gyda nhw ar cymal 4; Ilmington, 2.1km ar 5%; Edge Hill, 800m ar 10%; a Burton Dassett, 1.7km ar 5%.




Cymal 5 - Cockermouth i Whinlatter (RECT)


Ras yn erbyn y cloc i dimau (RECT) sydd ar y fwydlen ar cymal 5 gyda dringfa raddol yn yr ail hanner.


Mae'n bosib y bydd y cymal yma'n cael dylanwad mawr ar y dosbarthiad cyffredinol terfynol - yn enwedig o gofio cryfder rhai timau.

Cymal 6 - Barrow-in-furness i Whinlatter


Unig gymal diweddglo copa Taith Prydain eleni a hynny ar frig Whinlatter Pass, dringfa 3.2km ar 7%. Caiff ei goncro ddwywaith ar y cymal.


Yn ogystal, bydd dringfeydd y Hawkshead Hill a Fangs Brow (y ddau'n gategori 1) ynghyd a Dunmail Rise (categori 3).


Cymal 7 - West Bridgford i Mansfield


Cymal gwibio unwaith yn rhagor gyda thair dringfa gategori 4 ar ddechrau'r cymal - Keyworth; Bank Hill ac Oxton Hill.

Cymal 8 - Llundain


14 lap o 5.5km yn Llundain ar gyfer cymal wibio ddinesig sy'n gyfanswm o 77km.

Y dosbarthiadau

Chwith i'r dde


Dosbarthiad Cyffredinol OVO Energy - I gyd-fynd gyda'r noddwyr, crys gwyrdd fydd arweinydd y dosbarthiad cyffredinol yn ei wisgo.


SKODA Brenin y Mynyddoedd - Yn erbyn y traddodiad o bolca dot, mae Skoda'n noddi'r dosbarthiad mynyddoedd lle, fel arfer, mae un o'r dihangiad yn llwyddo.


Dosbarthiad Gwibio Eisberg - Cyfle i reidwyr y dihangiad gipio pwyntiau'n y gwibiau canolig.


Dosbarthiad Pwyntiau Wahoo - Y reidwyr yn y 15 uchaf i gyd yn cael pwyntiau ar gyfer y dosbarthiad yma.


Reidwyr i'w gwylio


Yn serennu i dim Sky mae Geraint Thomas, Chris Froome, Vasil Kiriyenka, Ian Stannard a Lukasz Wizniowski i gefnogi Wout Poels.


Mae enwau mawr eraill yn cynnwys Primoz Roglic, Stefan Kung, Jos van Emden, Alex Dowsett a Tony Martin.


Yn cystadlu am gymalau'r gwibwyr mae Caleb Ewan, Edvald Boasson Hagen ac Andre Greipel ymysg eraill - ond mae Mark Cavendish a Marcel Kittel wedi tynnu allan oherwydd salwch.