Ar y cymal cyntaf yn yr Alpau yn y Tour de France eleni, ni chawsom ein siomi gan y ddrama a gynhyrchir gan y lleoliadau hudol.
Alaphilippe yn fuddugwr poblogaidd
Y Ffrancwr Julian Alaphilippe, yn reidio yn lliwiau Quick-Step Floors, gipiodd fuddugoliaeth yn Le Grand-Bornand wedi diwrnod yn y dihangiad.
Goroesodd y ddringfa heriol y Col de la Croix Fry cyn casglu’r holl bwyntiau oedd ar gael ar y Montee du Plateau des Glieres sydd a graddiant cyfartalog o 11.2%.
Gweithiodd y dihangiad gyda’u gilydd ar y gwastatir prin, cyn i Alaphilippe ymosod unwaith yn rhagor ar y Col de Romme, ar y daith i bwyntiau llawn eto ar y ddringfa olaf, Col de la Colombiere.
Wedi esgyn i gopa’r ddringfa enwog honno roedd hi’n fuddugoliaeth swmpus i Alaphilippe wrth iddo hedfan i lawr y disgyniad yn gwybod mai ei ddiwrnod o oedd cymal 10.
Yn yr ail safle roedd y profiadol, Ion Izagirre (Bahrain-Merida), dros funud a hanner y tu ol iddo gyda Rein Taaramae (Direct Energie) yn gorffen funud a deugain eiliad yn ddiweddarach.
Van Avermaet yn cadw’r crys melyn?!
Efallai’n syndod i nifer, o wybod nad dringwr pur o bell ffordd ydyw, ond wedi diwrnod dewr a brwydrol yn y dihangiad, bydd Greg van Avermaet yn y crys melyn ar cymal 11.
Roedd hi’n berfformiad graenus ac urddasol gan y gwr o Wlad Belg i anrhydeddu’r crys melyn a’i dim, BMC, a’u gobeithion hwythau’n teneuo wedi codwm Richie Porte a cholledion amser enfawr i Tejay van Garderen.
Serch hyn, roedd ambell un o’r timau’n disgwyl symudiad ganddo, a gadawsant iddo fynd i’r dihangiad gan nad yw’n bygwth y DC terfynol.
I ddiogelu Geraint Thomas a Chris Froome, gweithiodd Team Sky yn galed ar flaen y peloton i sicrhau nad oedd unrhyw ymosodiadau am fod gan y ffefrynnau.
Canlyniadau
Cymal 10
Dosbarthiad Pwyntiau
Dosbarthiad Ieuenctid
Dosbarthiad Mynyddoedd
Dosbarthiad Timau
Dosbarthiad Cyffredinol
Cymal 11
Hwn yw’r cymal copa cyntaf o’r Tour de France eleni.
Gan gychwyn yn nhref Albertville, bydd y reidwyr mwy neu lai’n dringo o’r cychwyn gyda Montee du Bisanne (HC, cyfartaledd 8.2%) a’i gopa 26km i fewn i’r cymal.
Wedi’r disgyniad, mae ganddynt ddringfa heriol arall am 12.6km ar raddiant o 7.7%, y Col du Pre, hefyd wedi’w gategoreiddio fel HC.
Wedi hynny, mae ganddynt y poblogaidd Cormet de Roselend i’w daclo, cyn disgyn yr holl ffordd i Bourg St Maurice cyn y ddringfa 17.6km o hyd (cat 1), La Rosiere.
Oherwydd pellter y ddringfa olaf, credaf ei bod yn anhebygol i un o’r ffefrynnau ymosod ar y disgyniad o’r Roselend.
Ond, gyda’r graddiant cyfartalog ond yn 6%, mae digonedd o le yma am ymosodiadau ffrwydrol – pa un o’r ffefrynnau all serennu?
Darogan
Roedd nifer, megis Warren Barguil ac Alejandro Valverde, yn dangos gwendid ar y dringfeydd ar cymal 10.
Mae’r graddiant isel yn golygu y gall Chris Froome setlo i mewn i’w rythm yn hawdd, ond credaf mai Nairo Quintana fydd yn fuddugol yn ei ymdrech i geisio adennill amser.