TDF #2

Wel dyna ddechrau penigamp i’r Tour de France eleni.

Beth yr oeddem yn ei ddisgwyl: Cymal wibio syml, di-drafferth gyda’r cyntaf yn croesi’r llinell yn cipio’r crys melyn cyntaf a dim gwahaniaeth amser rhwng y ffefrynnau.

Beth ddigwyddodd: Cymal wib â Fernando Gaviria’n ennill ei gymal cyntaf yn y Tour de France a chymryd drosodd y crys melyn. Ond…

Y ffefrynnau’n colli amser

Er mai dim ond cnewyllyn bach o’r ffefrynnau ddioddefodd golledion amser cymharol sylweddol yn ystod y cymal cyntaf, roedd y rhai oedd yn destun i’r colledion yn brif ffefrynnau.

Wedi codwm, collodd Chris Froome 51 eiliad i’r grŵp blaen. Gorffennodd o gyda Richie Porte (BMC) ac Adam Yates (Mitchelton-Scott).

Cafodd nifer arall eu dal yn ôl oherwydd rhesymau gwahanol; gan gynnwys Egan Bernal (Sky) a Nairo Quintana (Movistar) gollodd funud a phymtheg eiliad.

Roedd y ffefrynnau eraill yn ddiogel yn y grŵp blaen, gan gynnwys Geraint Thomas (Sky), Romain Bardet (AG2R), Tom Dumoulin (Sunweb) a Vincenzo Nibali (Bahrain-Merida).Bydd hyn yn achosi newid yng nghynlluniau’r timau mawr, er rhaid cyfaddef ei bod yn gynnar yn y ras i’r colledion yma chwarae rhan yn y dosbarthiad cyffredinol ar ddiwedd y ras.Y tri tim sydd yn debyg o fod yn y tri uchaf ar y cymal RTEC ar gymal 3 fydd Sky, BMC a Sunweb. Gan gymryd na fydd unrhyw ddrama ar gymal 2, mae gan y tri tim gynrychiolydd i gipio’r crys melyn.Serch hynny, plan B fyddai’r un i wneud hynny o safbwynt Sky a BMC yn Geraint Thomas a Tejay van Garderen wedi i Froome a Porte golli amser.Ond o gofio fod Tom Dumoulin (Sunweb) wedi gorffen yn ddiogel ar gymal 1, byddai buddugoliaeth yn y RTEC yn cynnig y cyfle perffaith iddo gymryd mantais gynnar.

Groenewegen yn 6ed? Kittel yn 3ydd?

Roedd y wib orffenedig ychydig yn annisgwyl o ran y canlyniad ac eithrio’r ddau uchaf – Gaviria a Peter Sagan (Bora-Hansgrohe).

Roedd QuickStep wedi gweithio’n galed i gael Gaviria’n y safle perffaith ar gyfer y wib ac fe’u gwobrwywyd yn haeddiannol, tra fod Sagan yn ffefryn am y crys gwyrdd.

Ond ar ôl tymor sigledig gyda Katusha-Alpecin, byddai Marcel Kittel yn hapus iawn wedi gorffen yn drydydd – cyfle iddo godi ei hyder yn sylweddol.

Ac yn gorffen yn chwech roedd y ffefryn am y gymal, y gwibiwr Iseldireg ifanc, Dylan Groenewegen.

Disgwylwyd iddo serennu’n y cymal hwn ond mae digon o amser iddo serennu’n parhau i fod.

Canlyniadau

Cymal 1

  1. Fernando Gaviria (COL) Quickstep Floors; 04:23:32

  2. Peter Sagan (SVK) Bora-Hansgrohe, +yr un amser

  3. Marcel Kittel (GER) Katusha-Alpecin, +y.u.a.

  4. Alexander Kristoff (NOR) UAE Team Emirates

  5. Christophe Laporte (FRA) Cofidis

  6. Dylan Groenewegen (NED) LottoNL-Jumbo

  7. Michael Matthews (AUS) Team Sunweb

  8. John Degenkolb (GER) Trek-Segafredo

  9. Jakob Fuglsang (DEN) Astana

  10. Rafal Majka (POL) Bora-Hansgrohe

Dosbarthiad Reidwyr Ifanc, wedi cymal 1

  1. Fernando Gaviria (COL) Quickstep Floors

  2. Dylan Groenewegen (NED) LottoNL-Jumbo

  3. Thomas Boudat (FRA) Direct-Energie

Dosbarthiad Timau, wedi cymal 1

  1. Quick-Step Floors

  2. Astana

  3. Bora-Hansgrohe

Dosbarthiad Pwyntiau, wedi cymal 1

  1. Fernando Gaviria (COL) Quickstep Floors, 63 pwynt

  2. Peter Sagan (SVK) Bora-Hansgrohe, 37 pwynt

  3. Marcel Kittel (GER) Katusha-Alpecin, 24 pwynt

Dosbarthiad Mynyddoedd, wedi cymal 1

1. Kevin Ledanois (FRA) Fortuneo-Samsic, 1 pwynt

DOSBARTHIAD CYFFREDINOL

  1. Fernando Gaviria (COL) Quickstep Floors

  2. Peter Sagan (SVK) Bora-Hansgrohe, +4 eiliad

  3. Marcel Kittel (GER) Katusha-Alpecin, +6 eiliad

  4. Oliver Naesen (BEL) AG2R La Mondiale, +9 eiliad

  5. Alexander Kristoff (NOR) UAE Team Emirates, +10 eiliad

  6. Christophe Laporte (FRA) Cofidis

  7. Dylan Groenewegen (NED) LottoNL-Jumbo

  8. Michael Matthews (AUS) Sunweb

  9. John Degenkolb (GER) Trek Segafredo

  10. Jakob Fuglsang (DEN) Astana

Cymal 2

Cymal wib arall sydd i’w ddisgwyl yma – un debyg i’r cymal cyntaf a dweud y gwir.

Bydd y lonydd culion yn achosi gofid o gofio colledion amser ddoe, ond hefyd 1 dringfa categori 4, un canolwib ac un gwib ar gyfer eiliadau bonws.

Mae’n bosib y bydd y diweddglo technegol yn profi’n her i’r reidwyr, nifer o droeadau a gwyntoedd uchel yn sialens yn ei hun heb anghofio fod y graddiant yn 2-3%.

Darogan

Ar ol llwyddiant ysgubol ar y cymal cyntaf, i mi, mae’n anodd gweld heibio Fernando Gaviria a QuickStep Floors yn cymryd buddugoliaeth arall.